Ferizaj: U debatua statuti i AAKV "Kastriotët"
Mbi 40 anëtarë e drejtues të të gjitha gjeneratave të ansamblit, morën pjesë në debatin për statutin, i cili pritet të dalë për miratim në kuvend.
Sot në sallën e Kuvendit të Komunës së Ferizajt u mbajt tubimi për diskutimin publik të draftstatutit të ansamblit artistik të këngëve dhe valleve “Kastriotët”, i cili vitin e ardhshëm shënon 50-vjetorin e themelimit.
Draftstatuti përmban përkufizime për themelimin, veprimtarinë, natyrën e punës, statusin juridik, formimin dhe funksionimin e organeve drejtuese të ansamblit, mënyrat e zgjedhjes së tyre, vendimmarrjen dhe përgjegjësitë e organeve drejtuese, të stafit dhe anëtarëve dhe mënyrën e financimit të ansamblit.
Megjithë pjesëmarrjen e gjerë, pati pak diskutime, të cilat u përqendruan në angazhimet rreth zbatimit të statutit kur ai të jetë miratuar, rreth hartimit të rregulloreve përkatëse etj. me këtë rast u shtruan dilema se çfarë do të thotë profesionalizim i ansamblit, a do të profesionalizohet e tërë trupa, apo vetëm një pjesë e saj e të ngjashme.
Drejtoria e Kulturës bëri të ditur se edhe për pak ditë të interesuarit mund t’i japin me shkrim vërejtjet a propozimet rreth draftit të statutit të AAKV “Kastriotët”, derisa Kuvendi i Komunës ta miratojë këtë dokument./InfoKomuna/