Ferizaj së shpejti bëhet me Zonë Ekonomike

Temë e diskutimit në këtë takim ishte rritja e mbështetjes për Ferizajn, në pikëpamje të financimit të projekteve të ndryshme zhvillimore në kuadër të Buxhetit të Republikës së Kosovës për vitin 2019, me theks të veçantë, krijimi i zonës ekonomike, për të cilën janë përfunduar të gjitha procedurat e nevojshme.

Po kështu, në këtë takim u diskutua edhe për projektet e kulturës dhe rinisë, progresin e procedurave në disa prej projekteve zhvillimore të Ferizajt përmes së cilave është kërkuar financimi i tyre në kuadër të Buxhetit të Republikës së Kosovës për vitin 2019.

I pari i Ferizajt, Agim Aliu tha se me këtë mbështetje, qeverisja e tij do të realizojë qind për qind zotimet e dhëna para qytetarëve të Ferizajt madje do të tejkalohen edhe ato objektiva qeverisëse.

“Në emër të qytetarëve ju falënderojë të gjithëve për mbështetjen e projekteve që na keni bërë gjatë vitit 2018, projekte tashmë të filluara, por edhe projekte të tjera që duhet të mbështeten për shkak të fondeve që duhet të sigurohen për vitin 2019”, tha ai.

Zëvendëskryeministri Enver Hoxhaj konfirmoi mbështetjen nga niveli qendror, me theks të veçantë siç u shpreh ai, është çështje ditësh themelimi i një zone të mirëfilltë ekonomike për Ferizajn, duke shprehur interesin dhe vullnetin e qeverisë që Ferizaj të jetë një prej qendrave të mëdha dhe me infrastrukturën e nevojshme që lidh Republikën e Kosovës, kryesisht me Republikën e Maqedonisë së Veriut. /InfoKomuna/