Tri lëndë të DSHMS në Ferizaj dërgohen në hetuesi

FerizajPostuar: 14:52 / 23.05.2018

Drejtori i Drejtorisë së Shëndetësisë dhe Mirëqenies Sociale në Ferizaj, Besnik Berisha, sot ka mbajtur konferencë për media me ç‘rast ka njoftuar se tri lëndë të kësaj drejtorie nga ish-pushteti i kaluar, ku drejtor i kësaj drejtorie ishte Burim Karameta, i janë dërguar hetuesisë duke kërkuar hetim me dyshimet për keqpërdorime.

Sipas tij, lëndët të cilat janë dërguar në hetuesi janë organizimi i gala mbrëmjes së dytë e organizuar kjo nga ish-drejtori Burim Karameta, ku nuk dihet fati i 14 mijë eurove të grumbulluara nga ky organizim, furnizimi me pajisje mjekësore të cilat nuk janë përdorur asnjëherë në Qendrën Kryesore të Mjekësisë Familjare në Ferizaj, si dhe ndërhyrjet të cilat janë bërë në ndërtimin e shtëpive për skamnorët.

Në këtë konferencë për gazetarë drejtori i shëndetësisë dhe mirëqenies sociale, Besnik Berisha, ka thënë se gjatë këtyre muajve është arritur që të reduktohen edhe borxhet e kësaj drejtori për “Caritas Kosova”, një borxh i cili ka qenë mbi 290 mijë euro, ndërsa tash për tash është reduktuar në 67 mijë euro

Sipas drejtorit Berisha, me shlyerjen edhe të këtij borxhi do të mundësohet edhe ripërtëritja e marrëveshjes me “Caritas Kosova” për angazhimin e punëtorëve shëndetësor. /InfoKomuna/