Komunat e Anamoravës përballen me mungesë të autoambulancave

QKMF-ja në Komunën e Gjilanit ka në dispozicion 4 autoambulanca dhe mbulon një territor me një popullsi prej afro 90 mijë banorësh. Për këtë vit ata kanë planifikuar blerjen e 2 autoambulancave të reja dhe kanë ndarë një buxhet rreth 120 mijë euro. Kurse QKMF-ja në Komunën e Vitisë ka në dispozicion vetëm 3 autoambulanca dhe se ofron shërbimet në një territor i cili banohet nga 46 mijë banorë.

Drejtuesit e QKMF-së në këtë komunë deklarojnë se nuk kanë buxhet për blerjen e autoambulancave të reja dhe se kanë kërkuar ndihmë financiare në Qeverinë e Kosovës për këtë çështje, mirëpo nuk kanë marrë ndonjë përgjigje.

Në anën tjetër, QKMF-ja në Komunën e Kamenicës ka problem me amortizimin e autoambulancave, përveç mungesës së buxhetit për blerjen e të rejave.

Ushtruesi i detyrës së QKMF-së në Kamenicë, Fahredin Kryeziu ka thënë se do të tentojnë që të sigurojnë ndonjë donacion për autoambulanca. Ai thotë se kanë kontakte me diasporën shqiptare të cilët jetojnë në vendet e Bashkimit Evropian dhe të cilët edhe munden që të ndihmojnë në blerjen e një autoambulance.