Prishtinë: Mungesa e ujit, publikohet orari i reduktimeve

PrishtinëPostuar: 14:25 / 26.01.2021

Edhe sot qytetarët e Prishtinës nuk do të përballen me mungesë të ujit.

Kompania e Ujësjellësit Rajonal, KRU “Prishtina” ka publikuar orarin e reduktimeve të ujit.

Sipas komunikatës nga KRU “Prishtina” kjo vie si pasojë e nivelit të lartë të turbullirës në kanalin e Ibër Lepencit.

“Të nderuar konsumatorë, për shkak të situatës së krijuar së fundmi nga niveli i lartë i turbullirës në kanalin e Ibër Lepencit, kanal prej të cilit merret uji i pa përpunuar për tu trajtuar pastaj për pije ( ITUP Shkabaj / që si pasojë është jashtë funksionit ), e kemi të pamundur trajtimin e ujit për pije konform standardeve dhe teknologjisë që posedojmë. Në mënyrë që të bëjmë shpërndarje të barabartë të ujit për të gjithë konsumatorët dhe që, fokusi i mosfurnizimit me ujë të mos jenë vetëm zonat që furnizohen nga ITUP Shkabaj, ju njoftojmë me orarin e reduktimeve për këto zona : Nga ora 11:00-16:00 me reduktime nga dita e sotme do të jenë: Bregu i Diellit, banesat e bardha, Mati 1, Zllatari, Kolovica, Sofalia, Tasligje, Ulpiana, Kodra e Trimave, Arbëria, Lagjja e Spitalit, lagjja e Universitetit, Konviktet, Hajvalia, Graëanica dhe Veterniku. Ndërsa, duke filluar nga ora 12:00-16:00 reduktime të ujit do të kenë vetëm pikat e larta të qendrës së Prishtinës, Dardania , Lakrishtja, lagjja Pejton dhe Kalabria. Ndërsa, me reduktime nga ora 11:00-17:00 do të jenë të gjitha fshatrat që gravitojnë përgjatë gypit magjistral Albanik-Podujevë”, thuhet në komunikatën për media.