Komuna e Skenderajt me masa shtesë për bizneset gjatë pandemisë
Kryetari i Komunës së Skenderajt, Bekim Jashari, të premten ka nxjerrë Urdhëresë për ndërmarrjen e masave shtesë preventive nga bizneset që sipas vendimit të Qeverisë lejohen të operojnë në këtë situatë emergjente.
Me këtë urdhëresë bizneset nder të tjerash detyrohen:
1. Të bëjnë dezinfektimin e rregullt të hapësirave;
2. Supermarketet të bëjnë dezinfektimin e karrocave dhe shportave sa herë ato përdoren nga konsumatorët;
3. Në hyrje të bizneseve të vendosen dezinfektues që konsumatorët të dezinfektojnë duart para se të hyjnë brenda;
4. Furrat e bukës të ambalazhojnë bukën pas përgatitjes dhe para se t’i vendosin në rafte;
5. Në furra, markete e biznese të vogla të mos lejohet hyrja e më shumë se një personi njëkohësisht;
6. Bizneset bankare të vendosin xham ndërmjet punëtorit dhe konsumatorit, për të mundësuar distancën sociale të nevojshme;
7. Përveç punëtorëve në biznese edhe konsumatorët të përdorin masa mbrojtëse gjatë furnizimit me produkte e shërbime të nevojshme.
Kërkoj nga bizneset që të respektojnë në përpikëri këtë urdhëresë, ndryshe inspektorët do të kryejnë punën e tyre.
Çdo urdhëresë apo vendim që jemi duke marrë është në funksion të ruajtjes së shëndetit të qytetarëve tonë.
Të bashkuar do t’ia dalim!
Panik Jo, kujdes Po!