Komuna do të mbulojë shpenzimet e varrimit për qytetarët e Skenderajt

SkënderajPostuar: 14:03 / 21.03.2019

Kryetari i Komunës së Skenderajt, Bekim Jashari, nëpërmjet një postimi në llogarinë e tij në Facebook, ka kumtuar lajmin e mirë për qytetarët e komunës, që ka të bëjë me mbulimin e shpenzimeve për rastet e vdekjes.

Kryetari Jashari ka thënë se për herë të parë po fillon realizimi i projektit më përfitues i mundshëm për qytetarët tanë.

"Jam tejet i lumtur që t’ua kumtoj lajmin që për herë të parë po fillon e realizimi i projektit më përfitues i mundshëm për qytetarët tanë. Nga sot, secila familje që do të ketë rast vdekjeje, përveç dhembjes, nuk do të ketë edhe barrën e organizimit të varrimit në aspektin teknik, si dhe shpenzimet financiare për varrim", ka shkruar Jashari.

"Me një planifikim të mirë të buxhetit, kemi siguruar mjetet financiare për t’i mbuluar shpenzimet e domosdoshme, e që për raste të caktuara janë edhe të papërballueshme”, ka shkruar kryetari Jashari.

Ky propozim i kryetari Jashari ka marrë mbështetjen e anëtarëve të Komitetit për Politikë e Financa, të cilët i kanë rekomanduar Kuvendit për miratim. /InfoKomuna/