LDK-ja synon ta qeverisë e vetme Komunën e Vitisë
LDK-ja e Vitisë nuk e dëshiron ndarjen e hisesë së pushtetit komunal me me asnjë nga subjektet politike në këtë komunë, siç janë AAK-në, PDK-në Lëvizjen Vetëvendosje Nismën dhe AKR-në.
Kështu LDK-ja duke mos bërë koalicion me asnjërën nga këto parti politike është duke i rezervuar vetes të drejtën që ta qeverisë e vetme Komunën e Vitisë, shkruan sot “Koha Ditore”.
Mirëpo LDK-ja në KK përfaqësohet me vetëm 10 këshilltarë komunalë dhe mund të hasë në probleme nëse këto 5 subjekte politike, të cilat përfaqësohen me 17 këshilltarë, vendosin që të votojnë kundër pikave të cilat munden të propozohen nga LDK-ja gjatë seancave të ardhshme, ku edhe kërkohet miratimi i tyre me shumicë votash.
Vjollca Kadolli-Halili, këshilltare komunale nga radhët e LDK-së deklaron se do të qeverisin, duke mos bërë koalicione me partitë e tjera, siç kishte ndodhur mandatin e kaluar.