Bashkia e Gjirokastrës pastron kanalet ujitëse, mbështet fermerët
Administrata në Bashkinë e Gjirokastrës është angazhuar në një aksion të përgjithshëm në pastrimin e ambienteve publike si dhe të kanaleve kullues në ekonomitë bujqësore, në mirëmbajtjen e tyre në prag të fillimit të sezonit të vaditjes së bimëve të arave.
Gjithashtu nga kjo Bashki, janë parashikuar edhe investime konkrete në rehabilitimin e kanaleve vaditës si dhe është drejt përfundimit rehabilitimi i skemave ujitëse.
Specialistët e bashkisë kanë evidentuar në terren dhe objektet ku do të bëhen ndërhyrjet e shpejta si Ura e Kardhiqit, Ura e Levenishtit, Karburanti i Sonit, Bregu i Asllan Beut, Mashkullorë (pishina), Liqeni i Gjatit/Bregu i Bakshit, vazhdimi i kanalit të Cinit e disa objekte të tjera të rëndësishme.
Specialistët e bashkisë, çdo ditë ndodhen pranë fermerëve për t’i nxitur më shumë në orientimin drejt punës me tokat bujqësore.