Vala e re ndërtimeve, qytet brenda kryeqytetit, lajmërohet kompleksi me 49 kulla

Kompleksi i banimit është konceptuar si një qytet me vetë dhe do të nisë të ndërtohet në vitin 2019. Nga hapësira që zë, projekti është konceptuar si një qytet brenda qytetit, me hapësira për banim, qendër tregtare, hotel, shkolla, kinema, parqe, fusha sporti, hipermarket, kafene, restorante dhe një shumëllojshmëri shërbimesh të tjera.

Ndërtimi shtrihet në katër faza  në një sipërfaqe 673,500 metër katror dhe  do të administrohet nga vetë shoqëria. Ndërkohë komplekse të reja banimi kanë nisur dhe janë në nisje në Tiranë. Të paktën pesë te tilla po ndërtohen në pjesën qendrore dhe veriore të Tiranës. Blloqet e reja të banimit, “SiRI”, “Turdiu”, “Fiori Di Bosko” dhe “Square 21” janë në hapje të themeleve. Pallate të veçanta po ndërtohen sakaq në të gjithë Tiranën.

Kompania Edial ka njoftuar këtë vit të paktën 6 projekte të mëdha këtë vit dy prej të cilëve kanë nisur punën. Resorti Turistik “San Pietro Resort” me një vlerë investimi 88 milionë euro dhe kompleksi i banimit Fiori di Bosko po ndërtohen ndërsa është lajmëruar ndërtimi i tre fshatrave turistike në jugun e vendit.

Pas flluskës që sektori përjetoi në vitin 2008, likuiditetet e lira në ekonomi po orientohen sërish nga sektori i ndërtimit, kryesisht në Tiranë dhe në bregdet.

Katër projekte të mëdha me kulla mbi 30 kate janë lajmëruar të nisin që nga viti tjetër. Në mes tyre është edhe një kontrate investimi prej 250 milionë dollarësh nga një kompani private nga Dubai, e cila ka shprehur interes për ndërtimin e një kulle në zgjatimin e bulevardit të ri të Tiranës. Investitori është “Al Habtoor investment LLC”, kurse projekti “Kulla ikonike e Tiranës”.

Por nga ana tjetër Të dhënat demografike e bëjnë të zymtë perspektivën afatgjatë të Shqipërisë në drejtim të konsumit, apo tregut të pasurive të paluajtshme. Kjo nuk i ka penguar sipërmarrësit të rendin drejt ndërtimit të kullave në kryeqytet, në kuadër të planit të ri rregullues të Tiranës, duke rrezikuar krijimin e një mbi oferte në tregun e pasurive të paluajtshme, si për apartamente banimi, zyra, hotele e sidomos për hapësira tregtare.

Dy vitet e fundit, shtesa natyrore e popullsisë shqiptare ishte rreth 10.3 mijë persona, më e ulëta që nga viti 1990. Me rreth 32 mijë lindje në vit dhe 22 mijë vdekje, ky tregues është larg fillimit të trnzicionit, kur Shqipëria shtohej me 60-80 mijë persona në vit, sipas të dhënave të INSTAT.

Ndërtuesit e përfshirë në këto projekte janë të ekspozuar ndaj humbje, por ndërkohë askush nga institucionet përgjegjëse nuk po i orienton ato një drejt një modeli ekonomik të qëndrueshëm.