Vorë-Fushë Krujë, rrugë me parametrat e duhura të sigurisë dhe sinjalistikës
Një investim prej 4.9 milionë euro e shndërroi segmentin Vorë-Fushë Krujë në një rrugë me parametrat e duhura të lëvizshmërisë, elementëve të sigurisë dhe sinjalistikës.
Ky segment edhe pse renditet i dyti në vend për nga numri i mjeteve që qarkullojnë në ditë, pas autostradës Tiranë-Durrës, kishte degraduar në vite në një aks pa asnjë standard dhe me rrezikshmëri të lartë për aksidente rrugore.
Kryeministri Edi Rama uroi mirëmëngjes me pamje nga rruga e rindërtuar Vorë-Fushë Krujë.
“Mirëmëngjes dhe me pamjet e rrugës së rindërtuar Vorë-Fushë Krujë, ju uroj një javë të mbarë”, shprehet Rama.
11 kilometrat e aksit Vorë-Fushë Krujë iu nënshtruan rehabilitimit të plotë në kuadër të programit të qeverisë për mirëmbajtjen e akseve kombëtare.
Ndërhyrja në këtë aks parashikonte rehabilitimin e plotë të nënshtresave dhe paketë të plotë asfaltike, si dhe gjithë sinjalistikën vertikale e horizontale.
Ky aks konsiderohet me rëndësi, pasi lidh autostradën Tiranë-Durrës me pjesën e veriut të vendit, shkruan ATSH.