Drenasi nikoqir i kampit ndërkombëtar “Edu Camp Summer 2021”

Drenas, si nikoqir i organizimit të këtij kampi ndërkombëtar, i ka bërë të gjitha përgatitjet për pjesëmarrje fizike, por për shkak të pandemisë është mbajtur virtualisht në shkollën e mesme “Gjergj Kastrioti Skënderbeu”, pjesë e të cilit janë  nxënësit e mësimdhënësit e Drenasit.

“Jam i lumtur dhe ndjehem jashtëzakonisht mirë që kampi ndërkombëtar veror “Edu Camp Summer 2021”, po zhvillohet nga Drenasi me pjesëmarrjen kryeministrit Albin Kurti, zonjës Kerstin, nxënës, mësimdhënës, drejtor shkollash nga Gjermania, Austria dhe shtetet e rajonit”, është shprehur kryetari Lladrovci.

Ai ka shtuar se arsimi mbetet prioritet i përhershëm i qeverisjes së tij në Drenas.

“Kjo tregon se arsimi është prioriteti ynë i përbashkët, nxënësit e Drenasit të jenë në hap me nxënësit dhe arsimin e vendeve të BE-së, duke përfaqësuar edhe praninë e shtetit tonë. Prania e nxënësve dhe mësimdhënësve të Drenasit, si pjesëmarrësit e vetëm nga shteti jashtë BE-së në konferencën e organizuar nga Euroscola, është po ashtu sukses i arsimit dhe qeverisjes tonë. Nxënës, prindër, mësimdhënës, ju siguroj se mbështetja ime nuk do të ju mungojë asnjëherë”, ka thënë mes të tjerash ai.

Kryetari Lladrovci ka falënderuar udhëheqësen e Education Unlimited, znj. Kerstin Zielosko për këtë bashkëpunim.

Në këtë konferencë mori pjesë edhe kryeministri i Kosovës, Albin Kurti i cili falënderoi organizatorin dhe pjesëmarrësit, duke e vlerësuar të rëndësishëm programet e tilla si ky kamp.

Kerstin Zielosko, udhëheqëse e Education Unlimited falënderoi kryetarin Lladrovci dhe Drenasin si mikpritës për organizimin dhe hapjen e këtij kampi të rëndësishëm për nxënësit dhe mësimdhënësit, si hap i mirë i shkëmbimit të përvojave mes nxënësve të Kosovës me Gjermaninë dhe vendet e rajonit. /InfoKomuna/