Nis rrënimi i ndërtimeve pa leje në Ksamil dhe Velipojë

Postuar: 10:50 / 07.06.2021

Fadromat e Inspektoratit Kombëtar të Mbrojtjes së Territorit kanë zbritur në terren për të prishur duke nisur nga sot objektet pa leje në vijën bregdetare.

Një ditë më parë zv/kryeinspektori i IKMT Guri Seferi shpjegoi në emisionin “E-Zonë” për gazetaren Rajmonda Lajthia se cilat janë zonat më problematike.

“Velipoja si dhe Ksamili janë dy fshatrat turistikë ku dominojnë ndërtimet pa leje. Më së shumti bëhet fjalë për bare dhe restorante, por nuk  mungojnë dhe njësi akomoduese, pra hotele."

"Të gjitha objektet janë verifikuar lidhur me ligjshmërinë e tyre edhe me Agjencinë e Kadastrës. Prishjet do të pasohen edhe me heqjen menjëherë të inerteve.”

Me nisjen e aksionit këtë të hënë në Velipojë dhe Ksamil ka pasur që në mëngjes debate dhe përplasje mes pronareve të subjekteve që po prishen si dhe policisë.