Në përurim morën pjesë edhe përfaqësues të institucioneve komunale të Vitisë, përfaqësues të Fondacionit Kosovë-Luksemburg, personelit të shkollës dhe qytetarëve të këtij lokaliteti. Kryetari i komunës Sokol Haliti ka theksuar se vlera e bibliotekës, ka vlerë shumë më të madhe se ajo monetare, pasi që libri hap dyert e së ardhmes drejtë diturive të reja, por edhe zhvillimit të vendit.
“Ne së bashku me përfaqësuesit e fondacionit, jemi munduar që vazhdimisht të përmirësojmë ambientet shkollore dhe në kuadër të kësaj, pardje kemi bërë përurimin e kabinetit të informatikës në Pozheran. Sot po e bëjmë edhe këtë shkollë me bibliotekë, në mënyrë që ju nxënës të dashur të keni qasjen më të lehtë dhe më të afërt me librin”, ka thënë Haliti.
Ai ka bërë të ditur gjithashtu se komuna e Vitisë do të jetë komuna e parë që do të bëjë digjitalizimin e shkollave, me që rast kushtet për një vijim sa më të mirë të mësimit do të jenë brenda standardeve të kërkuara. Kurse Fisnik Beqiri drejtor i Fondacionit Kosovë-Luksemburg, është shprehur se biblioteka është menduar të jetë në shërbim edhe të komunitetit të Sadovinës, e jo vetëm për nxënësit. Ndërsa ka premtuar se do të vazhdojnë edhe në të ardhmen me projekte të ndryshme në sferat e caktuara, sipas kërkesave nga komuniteti. Sefedin Fetahu përfaqësues i fshatit Sadovinë e Jerlive, duke falënderuar për investimet që janë bërë kohët e fundit, ka njoftuar se përpos bibliotekës, Fondacioni Kosovë-Luksemburg ka ndihmuar shoqatën e grave të Sadovinës me makina qepëse, si dhe 6 fermerë të këtij lokaliteti me serra për prodhimin e perimekulturës.
Në fund kryetari Haliti ka pasur një takim me nxënësit e kësaj shkolle ku edhe i është përgjigjur pyetjeve të tyre.
/InfoKomuna/
