Komuna e Gjakovës Lanson Portalin e Qytetit “Gjakova Portal”

 Ky portal do të quhet “Gjakova Portal” dhe nga ai do të përfitojnë jo vetëm qytetarët, mirëpo edhe bizneset, turistët e investitorët.

Ky portal do të përmbaj funksione e vegla të ndryshme. Disa ndër to janë shërbimet komunale si e-certifikata, e-prokurimi, platforma për komunikim me qytetarë; mundësia për të caktuar takime në të gjitha departamentet e komunës si dhe kabinetin e kryetares; lajme; njoftime; informacione mbi biznese; informacione mbi pikat turistike; e të tjera. Për më tepër, në këtë portal do të integrohen edhe tri zgjidhjet për të përmirësuar shërbimet komunale, e-rekrutimi, e-kerkesa, dhe e-shpenzimi, që kanë dalë nga gara innovative “DigiGjakova”. Ky portal është vendi ku cdo qytetar që dëshiron të dijë cfarëdo në lidhje me qytetin e Gjakovës mund ti gjej të gjitha.

Realizimi i këtij portali mbështetet nga programi Anti-Korrupsion i UNDP-së dhe vjen si rezultat i njërit prej rekomandimeve të Planit të Integritetit që komuna ka hartuar në vitin 2014. Qëllimi i këtij portali është të shërbej si urë lidhëse ndërmjet qytetarëve dhe institucioneve lokale – kështu duke ofruar në një mënyrë më të qasshme informacione mbi sfera të ndryshme të jetës në këtë qytet – me një fokus të vecantë në punën e progresin e komunës. Kësi lloji, transparenca rritet; duke rezultuar që qytetarët të jenë më të fuqizuar të kërkojnë llogaridhënie.