Ferizaj formon Këshillin e eksperteve në fushën e mjedisit dhe urbanizmit
Drejtori i Drejtorisë së Urbanizmit dhe Mjedisit në komunën e Ferizajt, Lulzim Aliu, të hënën mbrëma, ka mbajtur një takim me ekspertë të fushave të ndryshme me ç’rast ka formuar edhe një këshill të ekspertëve që do të merren kryesisht me punë të urbanizmit.
Sipas drejtorit Aliu, ky këshill është prej 12 anëtareve dhe do të merren me çështje shumë të rëndësishme të qytetit, transmeton InfoKomuna.
“Sot arritëm që të formojmë këshillin, ky këshill do të jetë këshill konsultativ, duke u bazuar edhe ne Ligjin për Vetëqeverisje Lokale dhe ka qenë e drejtë e kryetarit për të formuar trupa këshilluese të cilat kanë munguar në komunën tonë.
Ky këshill i ka 12 anëtarë dhe do të luaj rolin konsultativ dhe do të jep kontributin e vet në faza të ndryshme që na presin si në Planin Zhvillimor Komunal, por edhe në hartimin e hartave zonale, një diçka që është shumë e nevojshme dhe e domosdoshme”, është shprehur drejtori Aliu.
Numri një i Drejtorisë së Urbanizmit Lulzim Aliu, ka thënë se ky hap për formimin e këtij këshilli është ndërmarr duke parë gjendjen e qytetit në aspektin e urbanizmit.
“E ardhmja e qytetit në aspektin e urbanizimit është shumë e rëndësishme, evitimi i kaosit që ka ekzistuar deri tash, barra e asaj se çfarë Ferizaj do të jetë në të ardhmen, është shumë e madhe dhe me të drejtë edhe kryetari, por edhe unë si drejtor i urbanizimit nuk kemi dashur ta marrim këtë peshë vet, por do të konsultohemi me ekspertë për të ardhmen e urbanizmit e cila do të bazohet në profesionalizëm”, ka thënë drejtori Aliu.
U bë e ditur se ky këshill do të mblidhet sa herë që është nevojë dhe do të diskutoje për secilin problem veç e veç. Në këtë këshillë janë të angazhuar arkitekt, gjeodete, ekspertë të hidros, inxhinierë etj. /InfoKomuna/