Digjen kabllot elektrike, mijëra konsumatorë mbesin pa energji elektrike në Fushë Kosovë

Fushë KosovëPostuar: 10:52 / 17.06.2019

Mijëra qytetarë mbrëmë në Fushë Kosovë rreth mesnatës kanë mbetur pa energji elektrike. Zëdhënësi i KEDS-it, Viktor Buzhala, përmes një njoftimi ka bërë të ditur se arsyeja e mungesës së energjisë ka qenë djegia e kabllove të tnesionit të ulët dhe atij të mesëm si pasojë e djegies së bërllogut.

“Natën ndërmjet të dielës dhe të hënës, përkatësisht rreth orës 1 pas mesnate ka ndodhur një akt i shëmtuar në lagjen 28 të Fushë Kosovës. Nga diegia e bërllogut janë djegur edhe kabllot e tensionit të ulët dhe atij të mesem. Si rrjedhojë kanë mbetur pa energji elektrike për afro një orë mijëra qytetarë. Përkundër kohës pas mesnate, ekipet e KEDS-it kanë dalë menjëherë në vendin e ngjarjes dhe kanë arritur ta sanojnë dëmin dhe konsumatorëve t’ua kthejnë energjinë elektrike rreth orës 1 e 50”, ka thhënë ai.

Sipas tij, KEDS apelon tek qytetarët që të mos ndezin zjarre në asnjë rrethanë, pasi që siç tha ai pasojat në asetet energjetike, sidomos kur afektohen ato të tensionit të mesëm, mund të jenë katastrofike.

“Flakët kanë rrezikuar edhe nënstacionin e nga diegia eventuale e nënstacionit do të rrezikoheshin të mbetnin pa energji elektrike për kohë të gjatë komplet lagjja. Kjo situatë është e papranueshme. KEDS apelon tek qytetarët që të mos ndezin zjarre në asnjë rrethanë, pasi pasojat në asetet energjetike, sidomos kur afektohen ato të tensionit të mesëm, mund të jenë katastrofike, godasin furnizimin njëherësh të mijëra qytetarëve dhe riparimi i tyre kërkon kohë të gjatë. Në rast se i shihni zjarret afër aseteve energjetike KEDS apelon të keni kujdes dhe të lajmëroni menjëherë kompaninë dhe zjarrëfikësit”, ka thënë Buzhala.