Pamje nga shpërthimi i depos së derivateve në Miradi të Epërme (Video)
Policia e Kosovës tha se katër persona janë lënduar nga shpërthimi që ndodhi rreth orës 14:00 në një depo derivatesh në fshatin Miradi e Epërme të Fushë Kosovës.
Zëdhënësi i Policisë për rajonin e Prishtinës, Agron Borovci, tha për KALLXO.com se njësitet e policisë dhe zjarrfikësit kanë dalë në vendin e ngjarjes sapo e kanë marrë informatën për këtë incident.
“Deri më tani raportohet për 4 persona të lënduar”, tha Borovci.
Ai tha se Policia ka nisur evakuimin e personelit nga rreziku i përhapjes së zjarrit.
“Duke parë rrethanat në vendin e ngjarjes si dhe mundësinë e përhapjes së rrezikut nga zjarri, Policia ka nisur evakuimin e personelit nga vendngjarja dhe varësisht nga rrjedha mund të bëhet edhe evakuimi i njerëzve nga një perimetër i caktuar që të shmangen pasojat eventuale”, tha Borovci.