Policia në Mitrovicë mban ligjërata në shkolla për sigurinë në trafik

Zëdhënësi i policisë për rajonin e Mitrovicës, Avni Zahiti, ka bërë të ditur për KP se këto ligjërata ku janë përfshirë nxënës të ciklit të ulët dhe ata parashkollorë, kanë për synim të plotësojnë nxënësit me njohuri shtesë dhe të domosdoshme në fushën e rregullave primare të sigurisë në trafik.

“Këto ligjërata përmbajtje kanë njohuri elementare të sigurisë në trafik. Janë të ilustruara edhe përmes broshurave të cilat u shpërndahen nxënësve, me qëllim që në mënyrë figurative të kenë mundësi të mësojnë dhe shohin disa nga rregullat e trafikut për njohje elementare dhe bazike për nxënës të këtij cikli”, ka thënë mes tjerash Zahiti.

Në anën tjetër, Suela Selimi, nxënëse e shkollës fillore ‘Mustafë Venhari’ në Vushtrri, tha se ka mësuar shumë për sigurinë në trafik nga ligjërimi i zyrtarëve policorë. Sipas saj, ligjëratat e tilla janë shumë të rëndësishme për nxënësit dhe ndihmojnë në ruajtjen e jetës së tyre.

“Këtë herë kemi mësuar si duhet të jemi në trafik, si të sillemi me rregullat e saj… Kemi mësuar se natën këmbësorët duhet të mbajnë një këmishë të veshur e cila e thithë dritën dhe shkëlqen natën, në mënyrë që makinat të dinë se kalojnë këmbësorët. Po ashtu kemi mësuar se nëpër shtegun e këmbësorëve duhet të kalojmë, por jo të dalim në mes të rrugës sepse mund të ndodhë ndonjë fatkeqësi…Për neve nxënësve këto ligjërata janë shumë të rëndësishme sepse ato na nevojiten që të mos rrezikojmë jetët tona”, tha ajo.

Përveç ligjëratave teorike në fushën e sigurisë në trafik, nxënësve u janë shpërndarë edhe broshura me përmbajtje ilustruese të rregullave primare e elementare për sigurinë në trafik. Ndryshe, gjatë këtyre ligjëratave u bë e ditur se angazhimet policore për ofrimin e sigurisë si dhe lëmin e këshillimit, edukimit dhe aktiviteteve tjera do të jenë të vazhdueshme përgjatë tërë vitit shkollor.