Shënohet dita e shkollave “Astrit Bytyqi” dhe “Muharrem Shemsedini”

Kryetari i Ferizajt, Muharrem Svarqa theksoi se emri i Astrit Bytyçit ua kujton flijimet e panumërta që janë bërë për lirinë dhe pavarësinë e Kosovës.

“Ky emër na kujton krijuesin e ri letrar, i cili kishte shprehje të artikuluar poetike dhe synonte të ngritej në intelektual e krijues me vlera elitiste. Na kujton të riun e dhënë pas sportit e kulturës, që bartte me vete gjithë peshën e rëndë të kohës kur e jetoi jetën e tij të shkurtër. Prandaj, ju nxënës, arsimtarë, prindër e qytetarët, ashtu si edhe ne të gjithë, duhet të mburremi në vazhdimësi me emrin e Astrit Bytyçit, me veprën e tij, e mbi të gjitha me flijimin e tij”, ka thënë kryetari Svarqa.

Të pranishmit në këtë aktivitet i ka përshëndetur edhe drejtori i shkollës “Astrit Bytyqi” Shaqir Govori, ndërkaq në emër të familjes ka folur Gafurr Bytyqi, babai i dëshmorit si dhe kryetar i Shoqatës së Familjeve të Dëshmorëve në Ferizaj.

Edhe shkolla fillore “Muharrem Shemsedini” në fshatin e vjetër shënoi ditën e saj.

Të pranishmit në këtë manifestim i ka përshëndetur, drejtori i kësaj shkolle Rrahim Sadiku. Ai mysafirët i ka njoftuar me aktivitetet e kësaj shkolle, por edhe më problemeve dhe vështërsitë me të cilat përballen.

Ndërkaq kryetari i komunës së Ferizajt, Muharrem Svarqa, ka thënë se kjo shkollë ka një traditë të gjatë e të begatshme arsimimi dhe edukimi, si njëra ndër vatrat me kontribut të çmuar, dhënë brezave të mëparshëm dhe të tashëm.

“Kjo traditë na bën të ndihemi mirë dhe t’i nderojmë të gjithë ata breza arsimtarësh, të cilët edhe në kohët më të vështira, nuk reshtën së punuari në misionin e tyre të shenjtë: arsimimin e popullatës së kësaj ane. Por sot, jemi në një kohë më dinamike se kurrë, kur njerëzimi ka bërë e po bën arritje të papara intelektuale, teknike e teknologjike”.

“Prandaj, para shkollës shtrohen detyra të reja, për të përballuar trendin e njohurive, shkathtësive e shprehive që kultivohen në botën e përparuar. Sot, më shumë se asnjëherë më parë, nevojitet punë kreative, kontakte me rrjedhat e mësimit dhe edukimit në Evropë dhe në Shtetet e Bashkuara, në mënyrë që proceset integruese të vendit tonë në bashkësinë e vendeve të zhvilluara, të jetë më i lehtë dhe më i natyrshëm”, tha Svarqa.

Për të pranishmit u shfaq edhe një program i pasur kulturo artistik, ndërkaq u ndan mirënjohje për mësimdhënësit e dalluar./InfoKomuna/