Rruga e Arbrit, hapet tuneli 500 metër i gjatë në Klos [FOTO]
Vijon me intensitet puna në Rrugën e Arbrit, e cila ka nisur nga ndërtimi para thuajse dy muajsh. Sipas ministrit të Infrastrukturës, Damian Gjiknuri, është hapur një nga tunelet e parë të kësaj vepre të rëndësishme. Bëhet fjalë për një tunel 500 metra të gjatë që ndodhet në një fshat pranë Klosit.
“Vazhdon me intensitet të lartë puna në kantierin e ndërtimit të Rrugës së Arbrit. Ditën e djeshme u shënua dhe hapja e tunelit T5 që është 500 metër i gjatë dhe ndodhet në fshatin Fshat të Klosit. Përtej këtij tuneli do të fillojë ndërtimi i Urës së Vashës, e cila do të kryejë lidhjen me anën tjetër të rrugës në drejtim të Bulqizës”, – deklaron Gjiknuri.
Parashikohet se rruga, Dibër-Tiranë të shkurtohet me 69 km, ku do të ketë lidhje me degëzimin e Klosit.
Rruga do t’i vlejë edhe Matit e Burrelit. Projekti trajton rrugën me të gjithë elementët. Do të shmangem kthesat e shumëfishta, ku parashikohen 6 tunele dhe 4 ura, si dhe një tunel për raste emergjence. Ndërtimi i Rrugës së Arbrit do të kushtojë 240 milionë euro dhe shteti do të marrë përsipër të likuidojë kontraktorin brenda një periudhe 13-vjeçare.
Kontraktori do të marrë përsipër të ndërtojë rrugën në fillim me shpenzimet e tij. Ai gjithashtu do të jetë përgjegjës për mirëmbajtjen e rrugës gjatë të gjithë periudhës së koncesionit.
Rruga e Arbrit konsiderohet si një vepër e vështirë nga pikëpamja inxhinierike, për shkak të relievit në të cilin kalon.
Sipas premtimit të qeveritarëve, rruga pritet të përfundojë para zgjedhjeve të përgjithshme të vitit 2021.
/INFOKOMUNA/
