Festivali "Takimet e poeteshave shqiptare" identitet kulturor për Vushtrrinë

VushtrriPostuar: 21:21 / 31.10.2018

Kryefjala e festivalit, përmes të cilit Vushtrria njihet si vatër e kultivimit dhe promovimit të fjalës së bukur, nga zëri i ëmbël femëror i poeteshave shqiptare, në këtë edicion ishte “Mosbindje femërore”.

Naime Beqiraj, poete me prejardhje nga Peja, me “Mosbindje femërore” u bë zë i fuqishëm jo vetëm si triumfuese e këtij festivali, por edhe me mesazhin e kundërshtimit femëror për t’ju bindur padrejtësisë.

Poetja e re vushtrriase, Medina Pasoma, përmes vargjeve të poezisë “Emri yt”, arriti të fitojë çmimin e dytë, ndërkohë që çmimin e tretë e ndanë poetet Blerina Tërbunja dhe Zade Kuqi. Çmimi Debutuesja e Festivalit u nda për poeten Sadije Krasniqi.Organizatorët kësaj radhe menduan edhe për një çmim të veçantë, i cili iu nda një njeriu të veçantë për stilin e tij të veçantë prej poeti.

Ishte ky poeti vushtrrias z. Nesim Spahiu, i cili edhe e hapi festivalin me një poezi të tij për Vushtrrinë.Për gjithë këtë organizim, natyrisht që kërkohej punë, angazhim, vullnet dhe përgjegjësi. E mbi të gjithë, punën më të vështirë e kishte juria, e cila pati për detyrë t’i vlerësojë poezitë.

Vlerësimi i poezive konkurruese në edicionin 36 të këtij festivali është bërë nga juria:

1. Vehbi Miftari;

2. Elvana Zaimi dhe

3. Donikë Gashi.

Këshilli Organizues i festivalit arriti që për dy ditë radhazi, poeteve t’u krijojë atmosferë që do t’u mbetet gjatë në kujtesë.Përshëndetjet lamtumirëse me poetet ishin vërtetë mallëngjyese për ne. /InfoKomuna/