Filloi ndërtimi i fushës sportive në hapësirat e SHFMU “31 Marsi”, në Gur të Kuq
Kryetari i Komunës së Rahovecit, Smajl Latifi, ka njoftuar se sot, me bashkëpunëtorë, në praninë e qytetarëve, mësimdhënësve dhe të nxënësve, filluan punimet për ndërtimin fushës sportive në Gur të Kuq, në hapësirat e ShFMU “31 Marsi”, një investim ky i mbështetur nga Komuna e Rahovecit, respektivisht nga Drejtoria për Kulturë, Rini dhe Sport.
“Në këtë projekt të bukur, të rinjtë dhe të rejat mund të zhvillojnë aktivitete sportive në futboll, në basketboll, në hendboll dhe në volejboll. Këtë fushë do ta shfrytëzojnë edhe nxënësit e mësimdhënësit e shkollës së fshatit.
Me ndërtimin e terreneve të reja sportive, Komuna e Rahovecit synon promovimin e sportit, të jetesës aktive dhe të shëndetshme, angazhimin e të rinjve me aktivitete fizike, si dhe konkurrencën e shëndetshme të garës.
Investimet në terrene sportive do të vazhdojnë edhe në vendbanime të tjera.” – tha ndër të tjera kryetari Latifi.
