QKMF e Prizrenit do të ofrojë kontrolle falas për sëmundjet e traktit urinar
Drejtoria e Shëndetësisë në Komunën e Prizrenit, së bashku me Qendrën Kryesore të Mjekësisë Familjare (QKMF), me datën 29.02.2020 (e shtunë) do të ofrojnë kontrolle të përgjithshme mjekësore (check-up) pa pagesë për sëmundje të traktit urinar.
Siç thuhet në njoftim, kontrollet përfshijnë:
1. Vizitën specialistike
2. Analizat laboratorike (CRP, Hemogram, Urea, Kreatinina, Urina, Jonogrami)
3. Tumormarkerët (PSA, AFP)
4. Ultrazërin e organeve urinare dhe prostatës.
Me këtë rast do të bëhet edhe ofrimi për herë të parë i analizës jonogrami (Na, K, Cl, Ca, Mg, P) në laboratorin e QKMF-së.
Të interesuarit për të përfituar nga këto shërbime pa pagesë duhet të caktojnë termine paraprakisht në kabinetin e ultrazërit (kati i parë) në Qendrën Kryesore të Mjekësisë Familjare nga data 24.02.2020 deri më 28.02.2020. /InfoKomuna/