Tahiri: Vushtrria partner i ngushtë i USAID-it
Drejtues të USAID-it, Programit për Komuna Transparente, Efektive dhe Llogaridhënëse (TEAM), program ky i vlerësuar si më i rëndësishmi që është duke e zhvilluar aktualisht në Kosovë nga USAID-i me mbështetjen e Ambasadës së ShBA-së në Prishtinë, janë pritur sot nga kryetari i Vushtrrisë, Xhafer Tahiri dhe drejtues tjerë të Komunës së Vushtrrisë.
Menaxheri i projekteve në USAID, Jeton Cana, tha se me drejtuesit e rinj të Komunës së Vushtrrisë pret bashkëpunim të ngushtë në zbatimin e këtij projekti 5-vjeçar që është duke u zhvilluar në vetëm pesë komuna të Kosovës, që pritet të jenë model jo vetëm për komunat tjera por edhe për qeverinë qendrore, në fushën e transparencës dhe llogaridhënies në menaxhimin e parasë publike, transmeton InfoKomuna.
Cana tha se Vushtrria nuk është përzgjedhur rastësisht në mesin e 5 komunave, në konkurrencë edhe me komuna të mëdha, pasi ka arritur rezultate të mira në transparencë, ka shprehur vullnet politik në përmbushjen e objektivave të përbashkëta, dhe është partner i rëndësishëm i USAID-it
Edhe drejtori i programit TEAM, Stephen Carpenter tha se transparenca e plotë dhe llogaridhënia në menaxhimin e parasë publike, konkretisht në prokurim është objektivi kryesor i këtij projekti.
Nga ana tjetër, duke falënderuar USAID-in për gjithë mbështetjen e deritanishme që i kanë Komunës së Vushtrrisë, kryetari Xhafer Tahiri është zotuar për bashkëpunim të ngushtë por edhe përkushtim të administratës komunale në përmbushjen e këtyre objektivave që janë parakusht themelor për zhvillimin e përgjithshëm të Vushtrrisë.
Nga ky takim kryetari Tahiri përmes përfaqësuesve të USAID-it i ka bërë ftesë si Ambasadorit të ShBA-së por edhe drejtorit të USAID-it që ta vizitojnë qytetin e Vushtrrisë.
Kryesuesi i Kuvendit Komunal, Nasuf Aliu, tha se do të vazhdoj rritja e transparencës të punës së Kuvendin Komunal.
Ndërsa nënkryetari i komunës, Besim Muzaqi, tha se kjo mbështetje e USAID-it po përkon edhe me zotimet e administratës komunale për transparencë dhe llogaridhënie para qytetarëve. /InfoKomuna/
Miratohet vendimi për themelimin e Zonës Industriale në Podujevë 10:23 / 19.04.2024 Kryetari i Komunës së Podujevës, Shpejtim Bulliqi, ka njoftuar se në mbledhjen e djeshme të Qeverisë së Kosovës është miratuar propozim vendimi për themelimin e Zonës Industriale në Komunën e Podujevës.