"PranverArt 8" bashkon 71 artistë në Muzeun Historik Kombëtar
Postuar: 10:14 / 15.09.2017
Në sallën e ekspozitave të Muzeut Historik Kombëtar në Tiranë është hapur ekspozita “PranverArt 8 – 2017” me vepra në pikturë dhe skulpturë të 71 artistëve më të njohur të vendit tonë, por edhe të bashkatdhetarëve tanë nga Kosova e diaspora.
Kjo ekspozitë është tashmë një aktivitet i përvitshëm tradicional, që ka zënë vend të përhershëm në kalendarin vjetor të veprimtarive kulturore të kryeqytetit.
Këtë vit, ky event vjen si rezultat i një bashkëpunimi të vyer mes grupit organizator dhe Muzeut Historik Kombëtar.
Në ekspozitë ishin të pranishëm shumë të ftuar dhe artdashës, të cilët ndoqën nga afër frytin e krijimtarisë më të fundit të artistëve pjesëmarrës.
Ekspozita do të mirëpresë vizitorët e vet deri më 22 shtator.