"Komuna e Ferizajt në gjendje të rëndë financiare"

Në këtë konferencë për media u theksuan sfidat me të cilat është përballur dhe po vazhdon të përballet qeverisja lokale, sukseset e arritura dhe planet afatshkurta dhe afatmesme për përmbushjen e zotimeve elektorale dhe realizimit të platformës qeverisëse.

“Komuna e Ferizajt është e para nga tri komunat me gjendjen më të rëndë financiare në Republikën e Kosovës, e konstatuar kjo nga mekanizmat kompetent në nivelin qendror. Megjithatë, në këto 100 ditë të qeverisjes lokale kemi arritur të menaxhojmë një krizë të jashtëzakonshme financiare dhe siguroj qytetarët e Ferizajt se të gjitha kapacitetet tona, ekspertët më të mirë, janë vënë në veprim për të parandaluar fiaskon financiare që rrezikon Komuna e Ferizajt nga borxhet dhe përmbaruesit privat”, theksoi Aliu.

Pasi renditi sukseset dhe sfidat në secilin sektor komunal, Kryetari i Ferizajt, theksoi “Unë dhe ekipi im, bashkëpunëtorët dhe gjithë administrata komunale, jemi të vendosur të qojmë përpara vizionin dhe modelin e mirëqeverisjes, platformën tonë qeverisëse që buron nga kërkesat qytetare, qeverisjes me nder e moral politik, të bazuar në ligjshmërinë dhe frymën e qytetarisë, të barabartë për të gjithë dhe profesionale për të tejkaluar sfidat. Ferizaj pas traumës së pësuar nga ish pushteti, ka hapur kapitullin e stabilitetit, punës dhe dinamikës së re, përkushtimit maksimal për realizimin e platformës sonë qeverisëse, për ndryshimin dhe përmirësimin e jetës së qytetarëve”, deklaroi kryetari Aliu. /InfoKomuna/