Qeverisja ilegale në komunat “legale”
Struktura ilegale të mbështetura nga Serbia vazhdojnë ta ushtrojnë pushtetin real në komunat e veriut të banuara me serbë, pavarësisht se nga 2013-a ato qeverisen prej autoriteteve të konfirmuara nëpërmjet zgjedhjeve që ka organizuar Kosova, shkruan sot Koha Ditore.
Ky realitet demanton Prishtinën zyrtare, që flet për integrim të veriut. Është vetë Qeveria e Kosovës ajo që ka folur për brishtësinë e funksionimit të katër komunave të veriut – Mitrovicës Veriore, Zveçanit, Zubin-Potokut e Leposaviqit.
E ka dhënë këtë konstatim në raportin mbi zbatueshmërinë e marrëveshjeve Kosovë-Serbi, të mbërritura në Bruksel. Raporti i referohet periudhës nga 1 janari e deri më 15 qershor dhe ministrja për Dialog, Edita Tahiri, ua ka përcjellë atë autoriteteve të Bashkimit Evropian.