Fillojnë punimet për ndërtimin e ballkonit panoramik dhe shtegut të ecjes në Mitrovicë

Në ceremoninë e fillimit të punimeve, i pranishëm ishte kryetari i komunës, Bedri Hamza, nënkryetari, Arian Tahiri, kryesuesja e kuvendit, Vesa Broja, drejtori për Ekonomi, Zhvillim dhe Turizëm, Elvis Feka.

Kryetari Hamza u shpreh i lumtur për fillimin e realizimit të këtij projekti, për të cilën tha se do të jetë nga vendet më të mira dhe më të frekuentuara në qytetin e Mitrovicës.

Ndërsa, drejtori Elvis Feka, ka theksuar se ideja për realizimin e këtij projekti është iniciuar nga Drejtoria për Ekonomi, Zhvillim dhe Turizëm dhe ka rëndësi të veçantë në zhvillimin e turizmit si dhe do të jetë një vlerë e shtuar për qytetin e Mitrovicës.

Ky projekt po realizohet në kuadër të marrëveshjes së bashkëfinancimit në mes të Komunës së Mitrovicës dhe Ministrisë së Zhvillimit Rajonal, vlera e të cilit është 250,000.00 euro.